Safaaradda Soomaaliya Ee Kenya Oo Bilowday Barnaamij Lagu Tabarucayo Qaxootiga Soomaaliyeed
Safaarada Soomaaliyeed ee Dalka Kenya ayaa bilowday olole lagu caawinayo Soomaalida Qaxootiga ku ah Dalka Kenya gaar ahaan Xeryaha Dhadhaab iyo Soomaalida kale ee ku dhiban Magaalooyinka waawayn ee Kenya Sida Nairobi.
Danjire Mohamed Cali Nuur(America) oo u waramay warbaahinta ayaa sheegay in ay hada soo ururiyeen Cunto iyo Timir maadaama lagu guda jiro bisha barakaysan ee Ramadaan wuxuuna sheegay in ay rajaynayaan in ay dhowaan geeyaan xeryaha Qaxootiga ee Dhadhaab iyo Kaakuma.
Safiirka ayaa sheegay in deeqda ay dhowaan gayn doonaan xeryaha dhadhaab ay isugu jirto deeqo ay soo ururiyeen Soomaalida Jaaliyada ah ee ku kala nool Kenya iyo dalal kale iyo sidoo kale Qaar ay Safaaradu iibisay.
Mudane Mohamed Cali Nuur (America) ayaa ugu baaqay Ganacsatada Soomaaliyeed ee kuu nool Magaalooyinka Nairobi iyo Mombasa ee aan weli ka qayb gelin raashinka iyo timirta loo ururinayo Soomaalida Qaxootiga ah in ay isa soo xilqaamaan oo ay wallaalahooda dhibban wax ka caawiyaan maadaama lagu guda jiro bishii barakaysnayd ee Ramadaan.
Safaarada Soomaaliya ee Kenya oo ka mid ah Safaaradaha ugu shaqada badan ee Soomaaliya ay dalalka Dibada ku leedahay ayaa caawinaad joogta ah u samaysay Soomaalida xeryaha qaxootiga ee Dhadhaab iyo Kaakumo ku nool iyadoo Safiirku booqasho bishii hal mar ku tago xeryahaas si uu ugu kuurgalo xaalada ay ku suganyihiin
-
Designed by